Opnar eige meieri på garden. Det er ho ikkje aleine om

Stadig fleire bønder satsar på lokale meieri og ysteri. I fjor blei over 3 millionar liter kumjølk foredla slik, ei tredobling på ti år. Med det nye Jerseymeieriet på Jæren blir det 100.000 liter meir.

– Eg ville skapa meg ein arbeidsplass. I staden for å kava med å få meir jord og større kvote, ville me heller utvikla garden i ei anna retning og foredla sjølve, seier Sonja Herikstad Skårland.

Med to millionar kroner i støtte frå Innovasjon Norge, starta ho bygginga av Jerseymeieriet.